ރާއްޖޭގެ 55 ރަށެއްގައި ކޮންޓްރެކްޓާ ފައިނޭންސް އުސޫލުން ކުރިއަށްގެންދާ ކައުންސިލް އިދާރާ އިމާރާތްކުރުމުގެ މަސައްކަތް ޖޫން މަހުގެ ނިޔަަލަށް ނިންމައި، ކައުންސިލްތަކާ ތަޅުދަނޑި ހަވާލުކުރާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރު އާދަމް ޝަރީފް މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން ހިންގާ މި 55 ކައުންސިލް އިމާރާތުގެ މަސައްކަތް ބާރަށް ކުރިއަށްދާ ކަމަށާއި، ޖޫން މަހުގެ ނިޔަލަށް މި މަސައްކަތްތައް ނިންމާލެވޭނެ ކަމަށެވެ.
މި ޕްރޮޖެކްޓްގެ ދަށުން އިމާރާތްކުރުމަށް ހަމަޖެހިފައިވާ 55 ކައުންސިލް އިމާރާތް ނިމޭއިރު، އެ އިމާރާތްތަކުގެ ގޯތީގެ ވަށާފާރާއި، އޮފީހަށް ބޭނުންވާ ފަރުނީޗާ ވެސް ލެވިފައި ހުންނާނެ ކަމަށް އެ ވުޒާރާއިން މީގެ ކުރިން ހާމަކޮށްފައިވެއެވެ.
ކައުންސިލް އިމާރާތްތައް ޒަމާނާ އެއްގޮތަށް މަރާމާތުކޮށް، ބޭނުންކުރެވޭ ފަދަ ހާލަތަކަށް ގެނައުމަކީ ރައީސް ޑރ. މުހައްމަދު މުއިއްޒު ރިޔާސީ އިންތިޚާބުގެ ކެމްޕޭންގައި ވެވަޑައިގެންނެވި މުހިންމު ވައުދެކެވެ. އެމަނިކުފާނުގެ ވައުދަކީ ފަސް އަހަރު ދުވަހުގެ ތެރޭގައި 120 އަށް ވުރެ ގިނަ ކައުންސިލް އިމާރާތް އަލަށް އެޅުމާއި، ހުރި އިމާރާތްތައް މަރާމާތުކުރުމެވެ.
ރައީސް ޑރ. މުއިއްޒު މި މަޝްރޫއު ފެއްޓެވުމުގެ ސަބަބު ބަޔާންކުރައްވަމުން ވިދާޅުވެފައިވަނީ، އެމަނިކުފާނަށް 30 ނޫނީ 40 އަހަރުވެފައިވާ ކައުންސިލް އިމާރާތްތަކަށް ޒިޔާރަތްކުރުމުގެ ފުރުސަތު ލިބިވަޑައިގެންނެވި އިރު، އެ ތަންތަން ހުރީ މަރާމާތު ވެސް ނުކޮށް، ވަރަށް ދަށް ހާލަތެއްގައި ކަމަށެވެ. އެހެންކަމުން، ރާއްޖޭގެ ރަށްރަށުގެ ތަރައްޤީއަށް މުހިންމު ދައުރެއް އަދާކުރާ ކައުންސިލްތަކަށް އެކަށީގެންވާ މަސައްކަތު މާހައުލެއް ފަހިކޮށްދިނުމުގެ ގޮތުން، ކައުންސިލް އިމާރާތް އެޅުމުގެ މަޝްރޫއު މި އަހަރުގެ ތެރޭގައި ފައްޓަވާނެ ކަމަށް އެމަނިކުފާނު ވަނީ ވިދާޅުވެފައެވެ.
