ވިލިމާޅެ އާއެކު މާލެ ސިޓީގެ ހަތަރު ސަރަހައްދެއްގައި ޕާކިން ބިލިޑިން އެޅުމަށް ހަމަޖެހިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅޫވީ ހެންވޭރު ރައްޔިތުންނާ ބައްދަލުކުރައްވާ ރައްޔިތަކު ކުރެއްވި ސުވާލަކަށް ޖަވާބު ދެއްވަމުންނެވެ.
ރައީސް ވިދާޅުވީ ޕާކިން ބިލްޑިންގެ މައްސަލަ ހައްލުކުރުމަށްޓަކައި އެމަނިކުފާނު މޭޔަރު ކަމުގައި ހުންނެވިއިރު އެކަން މަގުފަހިވެފައިއޮތީ ކުރެވޭ ގޮތަކަށް ނޫން ކަމަށާއި، ފަހުން ސަރުކާރުން އެކަން ކުރަން ވެގެން ކުރިމަތިލާފައި ތިބި ފަރާތްތަކާއެކު އެކަން ކުރުމަށްޓަކައި ގޮންޖެހުން ތަކެއް ކުރިމަތިވި ކަމަށެވެ. ރައީސް ވިދާޅުވީ ޕާކިން ބިލްޑިންގެ މަސައްކަތް މިހާރު އޮތީ އިންޑިއާގެ އެލްއޯސީގެ ތެރެއަށް ހިމަނާފައި ކަމަށާއި އޭގެ ހުރިހާ ލިޔެކިޔުންތަށް އިންޑިއާ ސަރުކާރަށް ފޮނުވައި މަރުހަލާތައް ކުރިޔަށްދާ ކަމަށެވެ.
ޕާކިން ބިލްޑިންއާއެކު މާލެ ސިޓީގެ ޓްރެފިކަށް ބޮޑު ލުޔެއް އަންނާނެކަން ރައީސް ފާހަގަކުރެއްވި އެވެ. ރައީސް ވިދާޅުވީ އޭގެ ތެރެއިން ދެ ބިލްޑިން ގާއިމްކުރާނީ މާލޭގައި ކަމަށާއި ދެން ގާއިމް ކުރާނީ ވިލިމާލޭގައި ބްރިޖުން ފައިބާ ދިމާލުގައި ކަމަށެވެ. ސަބަބަކީ ވިލިމާލެއަކީ ހިނގާބިގާވެ އުޅޭ ތަނަކަށް ވުމުން އެތަނަށް ޕާކިން ބިލިންޑިން އެއް މުހިންމުވާނެ ކަމަށެވެ. ހަތަރުވަނަ ޕާކިން ބިލްޑިން އަޅާނީ ހުޅުމާލޭގެ ރަނގަޅު ހިސާބެއްގައި އެންމެ ގިނަ މީހުންނަށް ބޭނުން ހިފޭ ސަރަހައްދެއްގައި ކަމަށް ރައީސް ވިދާޅުވި އެވެ.
ރައީސް ވިދާޅުވީ މީގެ އިތުރުން ވެސް މާލޭގެ ޕާކިން އަށް ހައްލެއް ގެނެސްދެއްވުމުގެ ގޮތުން މަސައްކަތްތަކެއް އެބަ ކުރައްވާ ކަމަށާއި އެކަމުގައި ސަރުކާރުން ދޭންޖެހޭ އެއްބާރުލުން ކައުންސިލަށް ލިބޭނެ ކަމަށެވެ. ޕާކިން މައްސަލައަށް ހައްލެއް ގެނައުމަށް މާލެ އަށް ދިމާވެފައިވާ ގޮންޖެހުމުން އަރައިގަންނަން އެންމެން ގުޅިގެން މަސައްކަތްކުރުމަށް ރައީސް އިލްތިމާސްކުރެއްވި އެވެ.
