ދިވެހި ނޫހެއް ކަމަށްވާ "އަދަދު" ނޫހުން އިސްލާމްދީނުގެ މުގައްދަސް އަޅުކަމަކަށް ހަޖޫޖަހައި ފުރައްސާރަކުރި މައްސަލައެއް ފެންމަތިވެފައި ވަނިކޮށް، އިދިކޮޅު އެމްޑީޕީން އެކަން ދިފާއުކޮށްފިއެވެ.
"އަދަދު" ނޫހުން ދަނީ ސަރުކާރުގެ އިސްވެރިންގެ ސިފައިގައި ސިޔާސީ ކާޓޫންތަކެއް އުފައްދައި، ސަރުކާރުގެ ނިންމުންތަކަށާއި ދައުލަތުގެ އިސް ބޭފުޅުންނަށް މަލާމާތްކޮށް ފާޑުކިޔަމުންނެވެ. ނަމަވެސް، އެ ނޫހުން އެންމެ ފަހުން ޝާއިއުކުރި ކާޓޫނެއްގައި ނަމާދުކުރަން ހުރި މީހެއްގެ ޖީބުން މީހަކު ފައިސާ ވަގަށްނަގާ މަންޒަރު ދައްކުވައިދީފައިވެއެވެ. މި ކުރެހުމަކީ އިސްލާމްދީނުގެ މުގައްދަސް ފަރީޟާއެއް ކަމަށްވާ ނަމާދަށް ފުރައްސާރަކޮށް، ދީނީ ކަންކަމަށް ހަޖޫޖެހުމުގެ ގޮތުން ތައްޔާރުކޮށްފައިވާ ކޮންޓެންޓެއް ކަމަށް ބުނެ އާންމުންގެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
މި މައްސަލައާ ގުޅިގެން މީޑިއާ ކައުންސިލުން ވަނީ އެ ކޮންޓެންޓަކީ މީޑިއާގެ އަޚުލާގީ މިންގަނޑާ ޚިލާފު އެއްޗެއް ކަމަށް ކަނޑައަޅައި، އެ ފޮހެލުމަށް "އަދަދު" ނޫހަށް އަންގާފައެވެ. އަދި އެކަމާ ގުޅޭގޮތުން ކައުންސިލަށް ޖަވާބުދާރީވުމަށްވެސް ވަނީ އަމުރުކޮށްފައެވެ. ނަމަވެސް، "އަދަދު" ނޫހުން ވަނީ އެ ކާޓޫނުގައި އުސޫލާ ޚިލާފު އެއްވެސް ކަމެއް ނެތް ކަމަށް ބުނެ، ދީނަށް ފުރައްސާރަވާ ގޮތަށް ހުރި އެ ކޮންޓެންޓް ދިފާއުކޮށްފައެވެ.
މި މައްސަލައިގައި އިދިކޮޅު އެމްޑީޕީގެ ފަރާތުން ބަހެއް ވިދާޅުވަމުން، ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވަނީ އެކްސްގައި ކުރެއްވި ޕޯސްޓެއްގައި "އަދަދު" ނޫހުގެ އަމަލު ދިފާއުކުރައްވާފައެވެ. މާރިޔާ ވިދާޅުވީ ދީނަށް ހަޖޫޖަހާފައިވާ ކަމަށް ބުނާ އެ ކުރެހުމަކީ ސަރުކާރަށް ފާޑުކިޔުމުގެ ގޮތުން ތައްޔާރުކޮށްފައިވާ އާޓްވޯކެއް ކަމަށެވެ. މީގެ އިތުރުން، މީޑިއާ ރެގިއުލޭޓްކުރާ ކޮމިޝަނަކީ މިނިވަން މުއައްސަސާއެއްގެ ބަދަލުގައި، މީޑިއާތައް ކޮންޓްރޯލްކުރަން މަސައްކަތްކުރާ ތަނެއްގެ ގޮތުގައި މާރިޔާ ވަނީ ސިފަކުރައްވާފައެވެ.
އިސްލާމީ މުޖުތަމައެއްގައި ދީނީ ކަންކަމަށް ހަޖޫޖެހުމަކީ ބަލައިގަނެވޭނެ ކަމެއް ނޫން ކަމަށް ބުނެ ގިނަ ރައްޔިތުން ދަނީ އެމްޑީޕީއަށާއި އަދަދު ނޫހަށް ވަރަށް ބޮޑަށް ފާޑުކިޔަމުންނެވެ.
